Qirg‘iziston Respublikasi va O‘zbekiston Respublikasi o‘rtasidagi madaniy hamkorlikni yanada rivojlantirish, ikki davlat o‘rtasida do‘stlik va yaxshi qo‘shnichilik munosabatlarini mustahkamlash maqsadida muhim qadam qo‘yildi. Qirg‘iziston Respublikasi Bishkek shahridagi 4-son musiqa maktabi hamda Surxondaryo viloyati Termiz shahridagi 2-son bolalar musiqa va san’at maktabi o‘rtasida o‘zaro hamkorlik memorandumi imzolandi. Mazkur memorandum doirasida tomonlar o‘rtasida madaniyat va san’at sohasida hamkorlikni kengaytirish, o‘quvchilar va pedagoglar o‘rtasida tajriba almashish, qo‘shma ijodiy loyihalar, mahorat darslari, tanlovlar va festivallarni tashkil etish rejalashtirilgan. Shuningdek, yosh avlodni milliy va umuminsoniy qadriyatlar ruhida tarbiyalash, iqtidorli o‘quvchilarni qo‘llab-quvvatlash hamda musiqa va san’at ta’limi tizimiga ilg‘or tajribalarni joriy etish asosiy yo‘nalishlardan biri etib belgilandi.